Ritbhatmarathi

Search
Close this search box.

फॅशन म्हंटल की त्यामध्ये विविध रंग,डिझाइन्स आल्या. भारतामध्ये मकर संक्रांत हा सण खूप उत्साहाने साजरा केला जातो. असं म्हणतात सूर्य मकर राशीमध्ये प्रवेश करतो म्हणून मकर संक्रांत हा सण साजरा केला जातो. वातावरणामधील थंडीपासून थोड्या प्रमाणात उब मिळावी यासाठी मकर संक्रांतीमध्ये आपण आहारात पांढरे तीळ किंवा पांढऱ्या तिळापासून बनवलेली वडी खातो.जसं वातावरणाला अनुसरून आपल्या भारतात आहार असतो अगदी त्याचप्रमाणे कपड्यांच्या फॅशन बद्दलही चोखंदळपणा आपल्या तरुण पिढीमध्ये अजूनही आहे.आता मकर संक्रांतीमध्ये पेहराव कसा असावा याबद्दल आपण जाणून घेणार आहोत.

मकर संक्रांतीला काळ्या रंगाचं महत्व

आपल्या भारतीय संस्कृतीत काळा रंग हा अशुभ मानला जातो. कुठल्याही शुभ प्रसंगी काळा रंग परिधान केला जात नाही याचे कुठेलच कारण अद्याप उघडकीस आले नाहीय तरीही आत्ता तरुणाईने काळा रंग हा अशुभ आहे ही संकल्पना मोडीस काढली आहे.घरगुती कार्यक्रम,ऑफिस पार्टी यामध्ये काळा रंग असलेल्या साड्या किंवा ड्रेस याला प्राधान्य दिलं जातं. काळ्या रंगाची वस्त्रे अंगावर अगदी खुलून दिसतात. आता मकर संक्रांत या सणाला आवर्जून काळ्या रंगाची साडी किंवा ड्रेस घालतात.

मकर संक्रांतीला काळ्या रंगाचं वस्त्र परिधान करावं असा प्रश्न आजकालच्या टिनेजर्सला पडलेला आपल्या दिसतो. तर यामागे शास्त्रीय कारण आहे. मकर संक्रांत हा सण येतो ते नेमकं हुडहुडी भरणारी थंडी असलेल्या महिन्यात म्हणजेच पौष महिन्यात. तर या दिवसात थंडीपासून उब मिळावी यासाठी काळ्या रंगाचे वस्त्र आवर्जून घालतात. काळा रंग हा बाहेरची उष्णता शोषून घेऊन एक प्रकारची उब शरीराला मिळते म्हणूनच काळ्या रंगाची वस्त्रे या दिवसात घालतात. अगदी साधे आणि सोपे उदाहरण द्यायचे झाल्यास आपण थोडेसे उन्हात गेलो तेही डोके कापडाने किंवा स्कार्फने न बांधता तरी डोके पटकन तापते कारण आपल्या डोक्यावरचे केस काळ्या रंगाचे असतात. काळा रंग उष्णता खेचून घेत असल्याने डोकं पटकन तापलं जात. एवढच नाही तर सोलर कुकर किंवा सौर तापक हे सूर्याच्या उष्णेतेवर अवलंबून असते आणि पाणी पटकन गरम व्हावे यासाठी काळ्या रंगाचे मेटल वापरले जातात. म्हणूनच ऋतुमानाप्रमाणे आपल्या शरीरालाही उष्णतेची गरज असते म्हणूनच मकर संक्रांतीमध्ये काळ्या रंगाचे वस्त्र परिधान केले जातात.

मकर संक्रांती लूक्स

१. ब्लॅक सिल्क साडी विथ रिच पल्लू

जेव्हापासून विणकरांना रेशीम निर्मितीचे तंत्र अवगत झाले अगदी तेव्हापासून सिल्क साडी अगदी आवडीने घातली गेली आहे. उत्तम तुतीच्या सिल्कने बनवलेल्या साड्या खूप महाग असतात. असंख्य प्रकार रेशीम साड्यांचे असतात. जाड काठ असलेल्या साड्यांची भुरळ तरुणींबरोबरच,अगदी पन्नाशीपर्यंतच्या आजीबाईंनाही पडली आहे. ब्लाउस निवडताना आपण एकदम पूर्ण साडी काळ्या रंगाची असेल तर त्या रंगा शिवाय वेगळा रंग आपण वापरू शकतो म्हणजे उदाहरण द्यायचे झाल्यास संपूर्ण काळा रंग असेल तर त्यावर सोनेरी रंगाचा ब्लाउस निवडावा. आता जाड काठ असेल तर त्या काठावर ज्या रंगाचा अगदी ठसठशीत असा पॉईंट आहे त्या रंगाचा ब्लाउस निवडावा म्हणजे साडीचं सौन्दर्य खुलून दिसेल.

२. जॅक्वर्ड सिल्क साडी

एक विशिष्ट्य प्रकारची सामग्री जी साडी बनवण्यासाठी वापरली जाते ज्यामध्ये विणण्याची एक विशिष्ट शैली वापरली जाते ती म्हणजे जॅक्वर्ड.  जॅक्वर्ड सिल्क म्हणजे हा एक फॅब्रिक च प्रकार आहे. मुख्यत्वे खास हिवाळ्यात या साडीचा वापर होतो.कारण जॅक्वर्ड सिल्क साड्यांमध्ये एक खास असा नैसर्गिक उबदारपणा असतो. जी तुम्ही हिवाळ्यात अगदी आरामात कार्यक्रमांसाठी घालू शकता.जॅक्वर्ड हे कापड विणण्याची एक जुनी पद्धत आहे ती प्राचीन काळी जॅक्वर्ड ड्रॉलूम नावाच्या प्रक्रियेत विणली जात असे.जॅक्वर्ड लूम चा शोध लागल्यानंतर मशीनवरती वेगवेगळे नमुने तयार करून कापड विणण्याची क्षमता वाढली गेली. संक्रातीमध्ये हा फॅशन ट्रेंड केला गेलाच पाहिजे.

३. ब्लॅक सिल्क पैठणी साडी

पैठणी साडी म्हंटल कि महाराष्ट्रातील येवल्याची पैठणी आपोआपच डोळ्यासमोर येते. येवला नव्हे तर पुणे,नाशिक,मालेगाव हि पैठणी साडीची महत्वाची केंद्रे आहेत.पैठणी ही साडी तिच्या वेगळेपणाची जगभरात प्रसिद्ध आहे. साडीच्या जाड काठात आणि भरजरी पदरात वापरले जाणारे शुद्ध सोने आणि चांदी हि पैठणीची खास अशी वैशिष्ट्येय आहेत.म्हणूनच जगभरात पैठणी साड्यांच्या यादीत अग्रस्थानी आहे. तरीही सध्याच्या काळात खेदाची गोष्ट म्हणजे साडीचा जडपणा आणि कडकपणा यामुळे साध्या पैठणी साडीची लोकप्रियता कमी झालेली आपल्याला दिसून येते.

म्हणून विणकरांनी पैठणी साडीमध्ये सिल्कचा नवीन ट्रेंड आणला आहे अगदी सुळसुळीत,चापूनचोपून बसणाऱ्या साड्यामध्ये पैठणी साडी ही अगदी तंतोतंत बसली आहे म्हणूनच पैठणी इन सिल्क नक्कीच ट्राय केली पाहिजे. काळ्या रंगांमध्येही पैठणी साड्या उपलब्ध आहेत साडीच्या कडेने लाल,सोनेरी किंवा कॉपर कलर बॉर्डर अगदी खुलून दिसते. या साडीवर ऑक्सी मेटल ज्वेलरी,केसांचा रुळत असलेला अंबाडा अगदी शोभून दिसतो. तर मैत्रिणींनो यंदाच्या संक्रांतीमध्ये हा फॅशन ट्रेंड नक्की कराच.

४. ब्लॅक अनारकली सूट विथ कॉटन सिल्क

अनारकली म्हंटल की आपल्याला आठवते ती…’प्यार किया तो डरना  क्या….’ या गाण्यातली मधुबाला आणि तिच्या अंगावर खुलून दिसणारा पायघोळ अनारकली ड्रेस कमरेपासून घेरदार आणि कमरेच्या थोडे वर अगदी मापात असणारा अनारकली लहान मुलींपासून ते तरुणींपर्यंत लोकप्रिय आहे. अगदी पैठणी पासूनही अनारकली सूट आवडीने बनवले जातात त्यात कॉटन सिल्कच्या मागणीमध्ये प्रचंड वाढ आहे. अनारकली मधेही बरेचशे प्रकार आहेत. स्ट्रेट अनारकली,पायघोळअनारकली,मस्तानी अनारकली,अनारकली विथ प्लाझो असे विविध प्रकार आपल्याला पाहायला मिळतात. कानामध्ये रुळणारे झुमके,मोकळे सोडलेले केस या ड्रेस वरती उठून दिसतात.अनारकली सूट असेल तर त्या ड्रेसच अधिक सौन्दर्य खुलून दिसतं ते त्यावर असणाऱ्या दुपट्ट्यामुळे संपूर्ण बुट्टेदार असलेला कुर्ता आणि त्यावर भरजरी दुपट्टा सुटच्या सौन्दर्यात भर घालतो.

४.१. प्लाझो सूट विथ बांधणी कुर्ता

कमरेत घट्ट आणि पायापर्यंत सैल असणारा शरारा हा एक लोकप्रिय वेशभूषेचा प्रकार आहे जो विविध कार्यक्रमात आवडीने घातला जातो. जसे कि लग्न समारंभ,रिसेप्शन इत्यादी. कमरेत घट्ट असणारी पॅंट या पोशाखाचे एक वेगळे आकर्षण ठरते त्यावर खास एम्ब्रॉडरी असलेला कुर्ता अतिशय खुलून दिसतो या मध्ये संपूर्ण बंद गळा,कॉलर असलेले टॉप,स्लिव्हलेस टॉप घालता येतात

४.२. ब्लॅक बेल्टेड टॉप विथ वॉटर कलर इफेक्ट

७० च्या दशकातील राजेश खन्ना च्या काळात जशी गुरु शर्ट ह्या लोकप्रिय फॅशनचा उगम झाला तसं मुलींच्या पोशाखातील वैविध्य काहीस गुरु शर्ट सारखा फॅशनचा प्रकार मुलींच्या फॅशन पेहरावात हल्ली दिसून येतोय. टॉप वरती एक बेल्ट लावलेला ज्याने टॉपला अल्टर करण्याची फारशी गरजही भासणार नाही टॉपची उंची फार नाही पण गुडघ्यापासून थोडं वरच्या बाजूपर्यंत टॉपची लांबी असलेला हा प्रकार तरुणींच्या पेहरावात पाहावयास मिळतो. प्लाझो हा पॅन्टचा प्रकार या टॉपवर्ती शक्यतो घालावा.

५. कांजीवरम सिल्क साडी

कांजीवरम साडी म्हणजे दाक्षिणात्य शैलीतली कर्नाटकी साडी या साड्या तामिळनाडू,चेन्नईपासून जवळ असलेल्या कांचीपुरम या ठिकाणी विणल्या जातात. कांजीवरम साडीचा मुख्य आणि आकर्षून घेणारा भाग म्हणजे बॉर्डर आणि पल्लू हे सामान्यतः जरीने किंवा सोन्याने सुशोभित केलेले असतात ज्यामध्ये कमळ,पोपट किंवा मोर यांसारख्या पारंपरिक स्वरूपाचे चित्रण केले जाते. काही भौमितिक नमुना याठिकाणी वापरला जातो.कांचीपुरम हे भारताच्या दक्षिण भागात असलेले ठिकाण जे सध्या विविध देवाल्यांसाठी प्रसिद्ध आहे. जसे की कैलासनाथ मंदिर,श्री वैकुंठ पेरुमल मंदिर त्याठिकाणची मंदिराची स्थापत्यशैली आणि त्यावर कोरलेली विविध देव देवता,प्राणी हि सगळी चित्रे साड्यांच्या काठांवरती सोन्याच्या जरीने सुशोभित केलेले असतात म्हणूनच या साड्या अगदी आवडीने घातला जातो. आता या संक्रांतीला कांचीवरंम ब्लॅक सिल्क साडी नक्की आवर्जून नेसून पहा.

६. खास लोहारी या पंजाबी सणासाठी काही ड्रेस

लोहारी म्हणजेच संक्रांति संबंधित साजरा केला जाणारा पंजाबी सण शेतीच्या हंगामाशी निगडित आहे.या सणाच्या दिवशी नवीन पंजाबी नववधू पंजाबी पोशाख परिधान करून सोलाह शृंगार करते. अग्निपूजा या सणाच्या दिवशी खूप महत्वाची मानली जाते आणि नववधूला याच अग्निपूजेचा भाग बनायचे असते म्हणून जर खास अशी वेशभूषा नेमकी कोणती असावी याच्या काही महत्वाच्या टिप्स

पटियाला सूट:

पंजाबचा मुख्य पोशाख असलेला पटियाला या पोशाखाला प्राधान्य आधी द्यावेसे वाटते.शक्यतो बोल्ड कलर जास्त उठावदार दिसतात म्हणून लाल,नारंगी,निळा यासारखे कलर निवडाव.केशरचना करायची झाल्यास वेणी पूर्ण घालून शेवटी परांडा जोड लक्षात ठेऊन घालावा.ज्यामुळे टिपिकल नववधूचा लूक मिळेल.

फुलकरी दुपट्टा ऑन पटियाला:

पूर्ण एका रंगाचा सलवार आणि त्याच रंगाचा कुर्ता असला कि त्यावर फुलकारी दुपट्टा किंवा पॅचवर्क असलेला दुपट्टा असला कि ड्रेसला एक वेगळाच लूक येतो. जस कि एकच रंग असला कि तो पोशाख हा पूर्ण गणवेश असल्यासारखा भासतो पण जर त्यावर फुलकरी दुपट्टा असला कि वेगळाच ट्रेंड आपल्याला दिसून येतो.म्हणून यंदाच्या लोहरीसाठी हा फॅशन ट्रेंड करावाच.

लोहरीसाठी केशरचना आणि ज्वेलरी:

केशरचनेमध्ये पंजाबी नववधू नेहमी परोंदा म्हणजेच केसांची व्यवस्थित अशी केशरचना करून वेणी बांधावी आणि ती शेवटच्या टोकापर्यंत गुंफत जावी आणि शेवटी एक परोंदा नक्की लावावा त्याशिवाय पंजाबी नववधूचा लूक पूर्ण होऊ शकत नाही. ज्वेलरी मध्ये कानात पूर्ण चेहरा हा पारंपरिक दिसावा म्हणून झुमका आणि बिंदी जरूर लावावी आणि सिंदूर याशिवाय नववधूचा शृंगार पुरा होऊ शकत नाही नक्की या गोष्टी लोहारीसाठी कराव्यात.

मोजडी:

नववधू ही पायाच्या नखापासून ते डोक्याच्या केसांपर्यंत नटलेली असावी म्हणून या खास दिवशी खास अशा वेषभूषेबरोबर पायामधे मोजडी नक्की घालू शकतो. मोजडी घालायची झाल्यास ती घुंगरू किंवा कशिदा केलेली मोजडी जरूर घालावी त्याने नववधूची वेशभूषा परिपूर्ण बनते.

७. मकर संक्रांतीच्या निमित्ताने नववधूसाठी केला जाणारा खास लूक

खास समजला जाणारा हा सण महाराष्ट्रातच नाही तर संपूर्ण भारतभर हा सण उत्साहात साजरा केला जातो. भारतात विविध राज्यात आपापल्या खास शैलीत हा सण साजरा केला जातो.

नववधूसाठी संक्रांत ही खास असते याच खास प्रसंगी हलवा सर्वांना वाटून तोंड गोड केले जाते.त्याच हलव्याचे दागिनेही करण्याची पद्धत महाराष्ट्रात आहे.फक्त नव्या सुनेसाठी हलव्याचे दागिने न करता जावयासाठीही हलव्यापासून दागिने बनवण्याची  पद्धत आहे. यामध्ये अंगठी,बाजूबंद,बिंदी,मेखला,ठुशी,चिंचपेटी,बोरमाळ,नथ,बांगड्या यासारखे दागिने बनवता येतात. याशिवाय पुरुषांसाठी फेटा,पुणेरी पगडी,लॅपटॉप,अंगठी,भिकबाळी,हातातले कडे असे दागिने बनवता येतात. त्याचप्रमाणे लहान मुलांची बोरनाहंन करण्याची पद्धतही आपल्या महाराष्ट्रात आहे. श्रीकृष्णाच्या पेहरावाप्रमाणे मोठी माळ,मुकुट,कानातल्या बाळ्या,तोडे यांसारखे हलव्याचे दागिने लहान मुलांसाठी बनवता येतात. मग मैत्रिणींनो यंदाच्या संक्रांतीला कपड्यांचा आणि हलव्याच्या दागिन्यांचा नवीन ट्रेंड नक्की करायचा.

हेही वाचा