marathi ukhane:
बरसल्या पाऊसधारा म्रुद्गंध दाही दिशांना
रावांचा हात हाती बागेतून फिरताना
पाऊसगाणी गातात सानसानुले पक्षी
रावांच्या न माझ्या प्रितीला निसर्ग साक्षी
मेघांच्या पोटात पावसाचं पाणी
रावांसोबत गाते मी जीवनगाणी
वीज कडाडता काळजात लकलक
राव घराबाहेर, माझ्या जीवात धकधक
इंद्रधनुष्यात असतात सात रंग
रावांसोबत संसारात झाले मी दंग
पागोळ्यांच्या सरी तळहातावर झेलते
रावांच्या हौसेखातर नऊवारी नेसते
पावसाच्या पाण्यात सोडल्या होड्या
नका ना राव काढू माझ्या खोड्या
कोकणची भूमी नेसली शालू हिरवा
रावांनी आणली साडी रंग तिचा हळदुवा
रिमझिम रिमझिम पावसाच्या धारा
रावांच्या जीवाला जरा नाही थारा
पावसाचं पाणी पिऊन त्रुप्त सारे पशुपक्षी
रावांच्या अंगरख्यावर बारीक नक्षी
सड्यावर फुलली सुवासिक फुले
रावांना आवडतात लहान मुले
आभाळात उडतात बगळ्यांच्या रांगा
रावांच्या आवडीचं मला तुम्ही सांगा
ओल्या मातीचा गंध भवताली पसरला
राव दिसताच माझा चेहरा मोहरला
रानावनात पाऊस, तनामनात पाऊस
राया मला सोडून नको दूर जाऊस
डोंगरदऱ्यांतून वहातात आरसपानी झरे
रावांना आवडतात काप्या फणसाचे गरे
पहिल्या पावसाने माती गंधाळते
रावांच्या सहवासात मी फुलारते
थेंब थेंब झेलत घेऊ जोडीनं गिरक्या
रावांच नाव घेते नका घेऊ फिरक्या
पिसारा फिरवून वनी नाचतो मोर
रावांसोबत पहाते मी चंद्राची कोर
पाऊस आला मोठा पैसा झाला खोटा
रावांच्या सहवासात नाही आनंदाला तोटा
पानापानांतून घरंगळते पावसाचे पाणी
राव माझे राजा नं मी त्यांची राणी
–गीता गरुड.
